Despues di e wega Aruba 2 contra di Corsow, e muchanan di Aruba 1 mester a enfrenta e equipo di Guatemala. Ambos equipo a sa na gana nan respectivo prome weganan hunga y pa knockout. Guatemala ta gana di Colombia, mientras Aruba 1 ta gana Panama. 1inning, Guatemala ta habri y ta pone un coredor na segunda ariba un error di Mitchell Martis. Pero pitcher Abraham Taveras tabata solido cu dos ponche. Den bom di prome, Aruba ta bin bate, na unda Manuela, Didder ta poncha y Jandido ta muri cu linea pa left. Pitcher Dolis tabata solido ariba monticulo. Inning2, despues di un out, un base por bola ta ser duna y ariba un wildpitch, e coredor ta avansa pa segunda, despues pitcher Taveras ta bolbe bolea dos hungador di Guatemala y ta yena e base cu 1 out. Aki Aruba ta cambia Abraham Taveras y ta hinca Duinkerk, kende ta drenta releva. Un base por bola ta duna Guatemala su prome careda, 1 - 0. Pero Duinkerk ta sali bon den e inning, ora e ultimo out ta ser saca ariba un rolling pa segunda. Den 2inning, Mitchell Martis ta dal su segundo homerun den e Parke di Winston, esaki ariba e prome lansamiento di pitcher Dolis pa e 1 - 1. E bateadornan siguiente Duinkerk y Moncion ta ser saca out, ambos cu roletaso. Miklos Petronia ta muri cu fly pa rightfield. Den habri 3inning, Guatemala ta ser yuda pa e muchanan di Aruba cu base por bola y wildpitch cu ta pone dos homber na base, pero un fly pa center ta completa e di tercer out. Den bom di e di tres inning, Aruba ta sali cu Luidens, kende ta yega primera ariba un infield hit, Manuela y Didder cu ta sigui ta buta toke, pero ambos ta sali out na primera, na unda Luidens ta yega tercera, e speranza di e equipo di NAS, esta   Jandido Tromp ta bin poncha pa completa e di tercer out. Den inning4, tanto Aruba como Guatemala no ta anota careda. Den inning5, e promer coredor di Guatemala ta yega base ariba un mal tiro pa primera, pero un hugada spectacular di Dwayne Luidens y un fly facil den man di Juan Moncion ta completa e tercer out. Den bom di cinco, Aruba ta pone tres homber ariba base, cu hit di Manuela y un out. Aki Guatemala ta cambia pitcher, na unda e ta enfrenta Raypatrick Didder, kende ta haya base por bola y Aruba ta bai ariba 2 - 1, Jandido Tromp ta dal un fly di sacrificio na unda Dwayne Luidens ta anota e 3 - 1, Mitchell Martis ta muri cu rolling pa pitcher. Den inning6, Guatemala ta pone un coredor na base, pero no por a anota careda. Remarcabel ta cu Guatemala no a bati hit den e wega aki. Den bom di 6inning, Duinkerk ta ricibi base por bola y ta roba pa segunda, ariba rolling di Milton Croes jr kende ta muri cu rolling pa tercera, Duinkerk ta avansa, Chadwick Tromp ta toka, na unda Duinkerk a sali out na home. E siguiente bateador, Petronia ta haya base por bola, Luidens ta muri cu rolling pa short. Den habri di 7inning, Guatemala ta haya su ultimo chens, na unda nan no ta hinca careda y Aruba ta gana su segundo partido, na unda Guatemala no ta dal hit.