Despues di un paar di weganan di seeding, y despues weganan di eliminacion, por ultimo a jega e dos equiponan Red Stars y Quick Electrical den categoria Tee Ball di 5-6 anja, pa hunga e gran final di e short tournament aki organisa pa Gold Glove Championship conjuntamente cu Aruba Center Little League. E resultado final a bisa cu e team di Red Stars cu ta biniendo trahando duro den e organisacion a logra bai cu e titulo maximo como e prome campeonnan di e torneo. E sistema nobo na unda cu torneonan corto cu hopi ambiente di baseball unda e mucha ta centraal ta trese cu ne un ambiente familiar y deportivo pa e muchanan y dirigientenan uni cu otro na bienestar di e mucha. E equipo di Quick Electrical di e organisacion di Little Bob Cat Organization a titula SUB CAMPEON, nan tambe a hunga un bon baseball desde un principio. E wega mes a bai tremendo ora cu den e prome inning caba Stars ta bai ariba 2-0 , den di dos inning Quick Electrical tambe ta score dos careda, asina e wega a sigi desaroya, te den ultimo inning # 6, caminda despues cu e wega a empata, Red Stars ta conecta un hit pa score e careda di victoria pa titula campeon, un emocion grandi den tur dos e fanaticada cu a gosa. Mester remarca cu pa e organisacion tur dos team a sali ganador pasobra e muchanan a sinja algo mas di baseball. un pabien ta bai na Red Stars como e campeonnan y pabien tambe pa Quick Electrical como e sub campeonnan. E proximo torneo lo cuminsa pronto y lo termina den e prome siman di december. PABIEN pa nos muchanan!