Manera cu e dianan ta pasando nos por sinta keto un rato y pone tur e puntonan un tras di otro y por saca algun conclusion. E directiva di ABBA encabesa pa Sr. Eric Mohammed, hunto cu su otro miembronan ta den winterslaap, of ta aproba tur e bagamunderianan cu ta pasando den baseball arubano. E problema ta sigi tambe den e organisacionnan miembro di ABBA y esunnan di LPA (Liga Preparatorio Arubano) tambe ta apoya e comision di CLPA cu a dirigi baseball infantil y hubenil pa e ultimo aña. Ta asina cu LPA sosteni pa e organisacionnan cu ta hungando den LPA a disidi pa schors e president Sr. Giovanni Leocadia pasobra no tin duidelijkheid den e parti finansas. Giovanni Leocadia tawata president di CLPA y alavez un manager di team, un situacion cu no ta cuadra den reglanan di bon manego pa cu cualkier organisacion. E dos otro miembronan di e comision di LPA cu ta Luigi Bergen y Gregory Milano a keda funciona manera nada no a pasa y sosteni pa e organisacionnan di LPA, un situacion masha abnormal, ora cu e comision ta faya di a laga e president hasi y deshasi cu fondonan di LPA. Eigenlijk no ta Giovanni Leocadia mester a hanja e schorsing, pero henter e comision di LPA, Luigi Bergen y Gregory Milano tambe mester risibi nan schorsing, pasobra nan a faya di no tawata tin e cosnan bon regla pa e organisacionnan di baseball y evita cu e situacion a bira asina cu asta mester a schors e president. E Responsabilidad di e comision, awe no por worde tira solamente riba e president Giovanni Leocadia, pero riba e comision completo. E confiansa den e hendenan aki cu ta traha cu mucha mester ta halto, mester tin transparencia, na unda tur cos mester ta duidelijk. Awe ta core pidi tur organisacion, asta organisacionnan cu no ta participando den e campeonato nacional, pa entrega pruebanan di pago, pa asina por sigi investiga cuanto placa a ser malversa den ABBA. Un situacion cu a bai totalmente for di man. Cu hopi atencion nos por a scucha un programa televisa di gobierno pa cu deporte, na unda nos minister a confirma publicamente cu bond di baseball no ta funcionando debidamente, demasiado ups and downs, den competencianan internacional. E bondscoach cu a traha hopi duro y a logra campeon na di weganan di reino na 2009, awe ta para keto y wardando riba juez pa dicta sentencia pa un problema entre ABBA y contract di e bondscoach y continuidad pa un mihor baseball. Cosnan asina ta cabando cu nos baseball. Ora cu bai evalua tambe e campeonatonan nacional mes, caminda cu den 2010, standing ta ser calcula abase di percentage, weganan gana of perdi, ningun hende por confirma cu exsactitud, tog subsidie commisie ta sigi sostene e dirigentenan cu ta danjando henter e deporte di baseball. E organisacionnan di baseball ta hungando actualmente den e campeonato organisa pa un comision na unda e president ta ser geschorst, un comision sin pia y sin cabes, y tog e organisacionnan ta mantene nan sosten, ta muestra di falta di curashi, pa tuma desicionnan na bienestar di e muchanan, cu nan mes ta pretende di tin na prome lugar. Nos ta menciona pretende, pasobra den realidad e muchanan no ta disfrutando di un campeonato dignamente organisa pa nan. Tin asina tanto deficiencianan e ultimo anja aki den baseball cu ta pone nos saca e conclusion ey. Deporte ta pa crea amistad, pero aparentemente deporte na Aruba a bira un guerra pa poder, un guerra personal, un grupito di dirigentenan cu ta ganja rabia y na final ta nan mes kier sigi dirigi na nan favor, en vez di train mas duro pa duna mihor bataya riba veld y asina e deporte bira medio pa educa nos jovennan pa traha duro pa bai dilanti. Indirectamente adultonan ta sinjando e muchanan "cheat" of corta e caminda cu ta recto pa hanja esun mas facil. Cambio den mentalidad mester bini awor pa asina scapa un generacion nobo pa deporte, vooral baseball.