Diabierna atardi, e weganan di Lifida B a continua ariba tereno di Britannia na Piedra Plat. E muchanan di Britannia bou guia di entrenador Ivo Lacle, mester a enfrenta e fuerte equipo di Caravel. Remarcabel ta cu ambos equipo tabata invicto pa loke ta e campeonato actual, ambos tabatin 8 wega hunga y sin conoce un derota. Pa loke ta e wega mes, mester bisa cu e muchanan di Caravel tabatin un domino ariba Britannia den prome tempo, principalmente e hoben Rick Werleman di Caravel tabata peligroso ora e avansa cu e bala, dado momento el a ehecuta un tiro liber cu ta dal den e lata y bai afor. Di otro banda e equipo di Britannia, no a mustra di a compronde otro bon ariba tereno, nan no por a yega manera debe ser, aunke cu den algun ocasion nan a haya dos bon bala pa anota gol, un di nan pa e hobencita Nanny Dirksz, kende awor ta reforza Britannia Lifida B, asina e wega ta bai aden 0-0. Den e di dos tempo Britannia ta cambia su sistema di hunga y ta bira mucho mas peligroso dilanti di e gol di Caravel. Algun biaha casi an ta habri e marcador pero e portero di Caravel ta luci y ta scapa su equipo. Caravel tambe ta haya algun oportunidad chikito, pero nan tampoco no por a haya e manera di anota gol y asina e duelo di invicto entre Caravel y Britannia ta keda 0 - 0.