Ta parce cu Deportivo Nacional por jama nan mes e sub-campeonnan pa loke ta e temporada di futbol veterano 2010. Den final di Fedeveta 50+, e equipo di Roma tabata mucho fuerte, despues den e final di 40+ tabata Inter di Solito tabata demasiado pa Deportivo Nacional y diasabra anochi, despues di tabata 2 - 0 ariba den e marcador y mas cu tur cos invicto, porfin Deportivo Nacxional lo a bai cu su titulo de 2010 cu tanto nan ta anhela pe. Pero, semper tin un tin, cu tin cu purba danja e fiesta, e biaha aki tabata e muchanan di Angochi, esta Caravel. E muchanan di Angochi, bou guia  Roy Helder a keda lucha fuerte y cu golnan prakticamente den pito di Javier Penate, esaki na dos ocasion, ta manda ambos equipo pa e tironan di penal y aki e cabez di Caravel tabata mas friew cu esnan di Deportivo Nacional, na unda nan ta logra gana e wega y e titulo pa medio di e pena maximo 5 - 4. Ban pa e recap di e partido. Den e prome tempo, Caravel tabatin e wega domina hungando y atacando bon, pero no por a logra sorprende portero Jorge Luminier, di oro banda Deportivo Nacional no por a sali facil for di defensa y e delanteronan Gonzales y Garcia tabata bon marca pa e defensa comanda pa Gio. Pero asina mes, Deportivo Nacional ta bai ariba ora cu na di 15 min lo inespera ta socede, ora un tiro di distancia ehecuta pa e bolante Teofilo Diaz, ta gara portero Bibi Loopstok di sorpresa, na unda e bala ta pika su dilanti y banje por completo, esaki ta dal den lata y drenta go pa e 1 - 0. Ni dos minut despues, tabata Leo Garcia kende ta tira duro, na unda e bala ta cai den skina robez pa e 2 - 0 pa Deportivo Nacional. Remarcabel ta cu den e prome mitad como 5 carchi gel a ser duna pa wega duro, nos ta kere si, pa arbitra un wega cu dos equipo lihe manera Caravel y Nacional, por a opta pa busca un arbitro cu ta mas ariba e wega, cu tur respet pa arbitro Fan Dijkhof. Segundo tempo Den e segundo tempo ya na di dos minut, e delantero Kendrick Lopez cu a caba di drenta e wega, mesora ta corta ventaha cu un tiro duro den skina drechi pa e 2 - 1. Mas e wega sigui su curso mas Caravel ta busca e gol di empate, na numeroso ocasion, arbitro Fan Dijkhof mester a saca su carchi pa calma e situacion, sigur mirando ora cu e minutnan final ta yegando secra. Pero prakticamente den pito, e defensa Javier Penate ta cobra un tiro liber magistral cu portero Luminier no por a wanta y asina e wega ta empata 2 - 2. Tempo extra lo mester a defini un campeon. Den tempo extra, net prome cu e final di e prome mitad, un infraccion ta ser cometi ariba Checho Gonzales, esaki ta pone Deportivo Nacional haya un pena maximo, cu ta ser bon cobra pa Leo Garcia, kende ta pone Deportivo Nacional dilanti 3 - 2, cu un tiro duro den skina robez. Den e segundo mitad, e muchanan Caravel a sali todo por todo pa busca e gol di empate y forza pa bai pena maximo. Net prome cu final di e partido, Caravel ta haya un otro tiro liber net na rand di e area penal, aki un bez mas, e homber suerte di e anochi, esta Javier Penate, ta para tras di e bala, su tiro liber cobra, no duro pero si cu efecto ta pasa bou curpa di portero Luminier cu ta faya barbaramente aki y asina e wega ta bira 3 - 3. Pena maximo lo mester defini e campeon di Fedeveta 35+. Mester bisa si cu e wega na ultimo no a bira uno mucho bunita, hopi reclamo cu metemento cu arbitro y linesman. Ta bon pa recorda un y tur cu Fedeveta tin cu keda un dibirticion, cual ta su obhetivo di mas grandi, mas cu claro bo por ta competitivo, pero un bez ta mishi cu linesman, e respet ya no ta existi. Den e tironan di penal, Victor Campas di Caravel ta hera, pero Juan Marmol y Lucho Ortiz di Deportivo Nacional tambe no por a haya e gol, despues di e ultimo tiro di penal ehecuta pa Richinel Maduro, e alegria tabata grandisimo cerca e fanaticada grandi di Caravel, kendenan a core subi tereno y basha champange ariba e hungadornan. Mas cu claro cu e celebracion a sigui na Angochi te den oranan lat di anochi.