Diasabra ultimo a tuma lugar e final di Fedeveta 35+ 2010 na tereno di Caiquetio caminda cu den e prome encuentro di e grupo di perdedor pa “Copa Cinco” S.C.A. ta bay cu e trofeo ganando di  Toke La Fama cu e score di 3 – 1. Despues nos a haya e bataya pa e di tercer puesto y aki un biaha mas Arusur ta mustra pakiko e ta entre e cuater mihonan di Fedeveta 35+ 2010 y ta sali victorioso ariba e team di Rooi Afo 2 – 1. Pa mas o menos 8.45 refree a pita pa e bala cuminsa lora entre e dos ganadornan cu a pasa pa final cual nan ta Nacional y Caravel. E wega ariba su mes tabata bon balansa y atake tras di atake di ambos lado. Nacional ta bay ariba 2 – 0 y asina tambe halftime ta bay aden. Ora cu tur fanatico lo a pensa cu Nacional lo a pasa facil ariba Caravel a dal nan dede duro pasobra Caravel a cuminsa pone presion ariba e arco di Nacional y ta corona esaki cu exito anotando 2 gol pa empata e wega y asina tambe e wega ta termina na dos gol pa banda. Despues a bay den prolongacion y atrobe Nacional ta bay ariba 3 – 2 pero Caravel no ta perde speranzo y ta empata e wega na 3 gol. Despues cu prolongacion a termina 3 – 3 a bay over na tiramento di penalty y e biaha aki si Caravel tabata tin mas suerte cu Nacional y ta logra bira campeon di Fedeveta 35+ 2010 ora cu Nacional ta benta dos penalty afo. Pabien na Caravel como campeon y tambe na Nacional cu e titulo di subcampeon, Arusur na di tercer puesto, Rooi Afo na di cuarto puesto y S.C.A. cu e titulo di Copa Cinco. Un palabra di gratitud na Fundacion Lotto pa Deporte pa nan aporte na Fedeveta, na tur e teamnan cu a participa den tur tres categoria, na fanaticonan fiel y mas cu claro na tur e refreenan cu a dirigi e partidonan, na David Cruz kende tabata e coordinador di e refreenan y na tanto  prensa skirbi, visual y di audio cu a duna nan aporte un biaha mas na e campeonatonan di Fedeveta durante 2010 y tambe na tur organisacionnan deportivo cu a pone nan tereno disponibel pa e weganan por a tuma lugar. Y last but not least un pabien na tur representantenan di cada team,y directiva completo di Fedeveta pa un otro logro di nos campeonatonan di veterano. Y por ultimo na nomber di Fedeveta nos kier a desea tur fanaticada, deportistanan y Aruba en general feliz dianan di Pasco y cu anja 2011 trece bendicion y salud pa un y tur.