Despues di e partido, a bai over na haci entrega di e respectivo premionan na esnan cu a sobresali. Presidente di Fedeveta, Joy Fingal a hiba palabra na unda el a gradici tur equipo y nan hungadornan pa un otro campeonato super exitoso. Tanto 35+, 40+ y 50+ tabata bon bishita y tur a caba manera programa. Prome a otorga e premio di Copa 5, esaki a bai pa SCA Paradera, despues a duna premio pa e di cuarto lugar cu a bai pa Rooi Afo, mientras cu di tercer lugar a bai pa e equipo di Arusur. A duna e maximo anotador di e campeonato 35+ su trofeo, e anja aki esaki a bai pa Checho Gonzales di Deportivo Nacional. Por ultimo a otorga e trofeonan di sub-campeon y campeon na Deportivo Nacional y Caravel. Por ultimo a saca e MVP di e partido, cu a bai pa Javier Penate kende cu su dos tironan liber den ultimo minutnan di wega ta scapa Caravel di un derota. Un pabien sigur di nos banda pa tur e equiponan ganador como tambe e organisacion di Fedeveta pa un otro anja exitoso.