Diaranzon 25 di januari, Dia di Betico, Copa Rotativo Betico Croes pa prome biaha ta conoce un campeon di South Little League, esta ekipo Aruba Bank di organisacion Rangers. Bate cayente di e hoben Jorge Vrolijk, hungador mas destaca, a yuda Aruba Bank tremendo cu 3 hit den 3 turno, di cual 1 ta homerun. Di otro banda Vaughn Bergen, e otro hungador mas destaca, a hasi su esfuerso den pitcheo y bateo (2 doublete den 3 turno) pa Toyota. Ambos hungador a destaca durante henter e torneo, cada uno cu su bate pa yuda su ekipo jega final. Jorge a caba e torneo c’un averahe di 0.778 y Vaughn c’un averahe di 0.750. Aruba Bank a gana cu score di 8 – 4 di Toyota pa titula campeon Copa Rotativo Betico Croes 2012. E score ta refleho d’un tremendo partido cu te den di quater entreda tabata enpareha na cuater careda. Den bom di inning number cinco e batenan grandi di Aruba Bank a los y anota 4 careda mas. Den semi-final Aruba Bank a pasa facil riba e campeon di aña pasa, esta Friomax, cu score di 15-0. Toyota, den e otro semi final, na su turno a knockout Aruba Lions cu score di 15-5, despues cu e wega tabata 7-5 den inning number cinco. Mester duna merito tambe n’e pelotero Jonathan Toromesa di Aruba Lions cu su bate cayente, cu dos homerun den e torneo aki. Ta un homerun a yuda Aruba Lions gana Friomax tambe pa keda na di tres lugar. Braves, Stars, Aruba Rotary y RBTT ta e otro cuater ekiponan c’a participa. Tur cuater tin hungador ‘jong’ y ta mustra prometedor pa futuro. Mester remarca cu Aruba Lions den su prome partido a laga Braves den tereno p’asina clasifica p’e semifinal. Nos mester yama danki n’e trabao di umpire di A.L.L.U. (Aruba Local League Umpires) durante e torneo. Un bon iniciativa pa laga dos hungador di cada ekipo lesa e credo di Little League prome cu cada wega cuminsa. Centro di Bario Noord ta gradici tur ekipo c’a participa n’e torneo Copa Rotativo Betico Croes 2012. Un felicitacion n’e fanaticada c’a presenta na gran escala y a sa di apoya cada pelotero den un forma positivo.