E All Star Game di futbol organisa pa AVB diarazon awor 1 di februari ta priminti di bira uno yena di emocion. E dos seleccionnan ya tin varios siman ta preparando pa e gran partidazo aki. Ambos seleccion ta entrena dos bez pa siman, mientras e hungadornan tur ta ancioso pa topa otro ariba tereno di bala. Den e seleccion internacional ta milita hungadornan clave manera entre otro Beyoda Marin, Alex Conceicao, Gleison Barios, Albert Francis y Rilove Janga di La Fama, tambe tin Raymond di Estrella, di RCA tin portero Maestre, Steven Rua, di Nacional nos tin Valdo Leocadia y Calcavante, di Britannia nos tin Sebastian Montoya y asina e lista di e hungadornan grandi di e seleccion internacional ta sigui. E seleccion internacional lo ser guia pa Guillermo Guerra y Polo Villar, actual tecniconan di Dakota. Pa loke ta e seleccion local nos por bisa cu esakinan sigur no ta menos, e hungadornan aki ta esnan cu mas a representa Aruba den exterior, claro cu falta algun pa motibo di ta den exterior, pero esnan presente sigur lo duna bataya fuertisimo. Nos tin entre otro Raymond Tromp, Dwayne Raven y Ricky Delecca di Dakota, Eric y Juancho Santos, Mau Escalona, Ronald Gomes y Ale Aparicio di RCA, Dedo Lake, Kenny Dania, Jean Polle Tromp y Theric Ruiz di Britannia, Calito Quandt di Riverplate, Pancho Croes di Estrella y asina e lista ta sigui bai cu nos mihor hungadornan. E seleccion local lo ser guia pa Veron Albertsz y Herbert Beeldsnijder. No ta keda nos nada otro di invita e pueblo di Aruba, e colonia Colombiano, Venezolano, Jamaicino, Brasilero y muy en especial e fanaticada di bon futbol, yega stadion di Frans Figaroa den gran masa y apoya nos futbolistanan local y internacional pa loke ta bira un partidazo di futbol. Na final lo tin Upgrade Music pa deleita tur presente, lo tin varios sorpresa mas. No laga otro contabo, yega bo mes y presencia esaki. Bala lo cuminsa lora pa 8or en punto.