Entregando un plakkaat na Presidente di Arubaanse Voetbal Bond, sr. Ruffo Kelly, directiva di Comite Olimpico Arubano a expresa su felicitación na ocasión di e di 80 aniversario di existencia di e federación. Entre e 24 federacionnan deportivo cu ta afilia na COA, AVB ta entre esunnan di mas aña di existencia y sigur un di esnan mas grandi den e famia Olimpico di nos pais. Secretaria General di COA, señora Nicole Hoevertsz a hasi entrega di e plakkaat conmemorativo durante un grandioso celebración di AVB, caminda un cantidad di invitado a bin celebra e acto aki hunto y den un ambiente festivo.  Secretaria General di COA a felicita directiva di AVB, pero tambe ex-dirigentenan, dirigentenan di clubnan, entrenadornan, hungadornan, mayornan y e gran cantidad di voluntario cu tur dia ta dedica nan tempo, cu tur amor, na formación di hobennan di nos país. En realidad e deporte futbol, conoci como e “Deporte Rey”, a produci hungadornan di gran nivel den nan tempo. Futbol ta forma parti di e historia Olimpico di nos país tambe, pasobra na momento cu e prome atletanan Arubano a participa na Weganan Olimpico, esey tabata den e deporte di futbol. Na aña 1952, na momento cu e Weganan Olimpico a tuma lugar na Helsinki, Finlandia, no menos cu shete futbolista di nos isla a integra e selección Olimpico di Antiyanan Hulandes. Nan tabata: Rayundo “Mundo” Kemp, Adriaan “Jani”Brokke, Juan Briezen, Jorge “Goochi”Brion, Leo Rodriguez, sr. Hernandez y Carlos “Cai” Helder. Na e momento aki sr. Leo Rodriguez ta e único hungador di e selección Olimpico aki cu ta na bida ainda y te cu recientemente e tabata Presidente di e Asociacion Arubano di Atletanan Olimpico di COA.   Entre su federacionnan afilia, AVB sigur ta entre esnan mas activo y cu ta mantene un relación excelente cu COA. AVB ta participa activamente na reunionnan, asambleanan, curso y charlanan cu COA ta organisa y ta dialoga regularmente cu e Direccion Tecnico di COA tambe. Ta pa e motibo aki hopi alentador pa mira cu e deporte di futbol a logra subi riba e ranking mundial na puesto numero 164 (entre mas cu 200 federacion), loke ta un progreso significativo compara cu añanan anterior. Mester reconoce e esfuerzo di e entrenadornan y integrantenan di e seleccionnan di futbol cu a logra e resultado aki. Sigur importante pa menciona tambe ta cu dos exponente di AVB a logra un puesto te den e structura di FIFA. Gregory Engelbrecht pa algún aña caba ta efectua e función didirector pa FIFA den e area di programanan di desaroyo y di e forma aki ta carga un responsabilidad grandi pa futuro generacionnan den e deporte di futbol. Sr. Ruffo Kelly recientemente a wordo nombra como miembro di e Comision Fair Play di FIFA, loke sigur ta un reconocimento pa su persona y pa Aruba. Speransa ta cu Arubaanse Voetbal Bond lo celebra mucho mas aña di existencia y lo sa tambe di sigui desaroya y asina logra mehora e nivel deportivo cada biaha mas. Pa COA e 80 aña di existencia di AVB ta un logro grandi, pa cua COA a expresa su sincero aprecio y admiración na tur esnan cu ta forma di e famia grandi di e organización aki y cu a aporta na su exito.   Riba e portret por mira e momento cu Secretaria General di COA, Nicole Hoevertsz, hasiendo entrega di e plakkaat na Presidente di AVB, señor Ruffo Kelly durante e acto di celebracion di e 80 aniversario di e federación.