Diasabra mainta tempran nos a bishita tereno di Caribe na Camacuri na unda nos a presencia e di tercer partido den e serie best of five den baseball Rookies AA entre Stars y Jani's Grasshopper. Siman pasa diasabra y diadomingo e chikitinnan di Stars ya a bai 2 - 0 den e serie final aki ganando ambos partido pa diferencia di un careda, pues dos wega super preta. Den e wega di awe e muchanan di Jani's Grasshopper mester a bin dicidi paso no tabatin un majan, ta awe so e resta y asina forza un wega pa otro di siman diasabra. Pero e muchanan di Stars, bou comando di coachnan Aldwin y Alex, no kier a tende nada y a bin dicidi di caba cos awe paso nan no kier a hunga otro siman. Mester bisa cu bou di un animacion enorme di parti di ambos fanaticada, e chikitinan di Stars y Jani's a luci den nan bateo como tambe den nan fildeo. Lamentablemente den deporte, ta un so por triunfa y esaki tabata Jani's Grasshoppers, kendenan ta bini di atras y ta gana Stars cu e score preta di 15 - 14 y asina forza un di cuarto partido cual lo tuma lugar diasabra awor ariba tereno di Caribe na Camacuri. Mester bisa cu e muchanan di Stars a menasa den nan ultimo turno na bate hincando lgun careda y lagando dos coredor na base, pero esaki no tabata suficiente pa para e prome triunfo di Jani's Grasshoppers den e serie final aki. No ta keda nos nada otro di haci un invitacion na henter e pueblo di Aruba, muy en especial e fanaticada di baseball, pa pasa tereno di Caribe diasabra awor y apoya e dos equiponan aki. Den nos seccion di Gallery nos por aprecia mas potret di e wega entre Jani's y Stars.