Dialuna anochi de stadion Frans Figaroa na Noord, Deportivo Independiente cu a bin cu fanaticada bestial, ta aplasta e team di Universal cu score di 7 pa 1.

E wega mes a cuminsa cu un Tiki di nervio di tur dos banda, caminda den e prome minuutnan tabata tin hopi pasenan malo, pero mas o menos na di 15 minuut di wega , e muchanan di Super Depor ta tuma e wega full over y di eynan ta wega bunita combina cu gol so a bin. E prome gol ta wordo anota pa Marlon Maduro for di un rebound den aerea penal. Despues ta e hoben Balduino Krozendijk, ariba un pase di Glembert Kock, ta kita un defensa magistralmente for di su curpa y ta deposita e bala den net. 10 minuut después ta Milton Badillo ta bai laga tur hender iba un bon pase di Rafa Mercado y ta score e 3-0. Prome cu halftime a bai aden Universal ta score e gol di salba honor, ora cu riba un bruhashon entre e Keeper y e defensa di Hooiberg e bala ta pika drenta gol. Cu e score aki half time ta bai aden. Di dos tempo tabata un concierto di futbol duna pa Super Depor. Cuatro gol di caliber halto ta wordo gescore, 2 pa Rafael Mercado, 1 di Segundo Basauri, 1 mas di Milton Badillo. Total di e partido ta duna 2 gol di Milton Badillo, 2 di Rafa Mercado , 1 di Segundo Basauri, 1 di Balduino Krozendijk y 1 di Marlon Maduro. Awor Dep.Indep. Hooiberg ta full cla pa hunga e final dia 29 di April, cual lo ta contra Arsenal. Pa esaki Directiva,hungadornan y miembronan ta invita tur fanaticada pa bin apoya nos atrobe, mescos y mas cu dialuna pasa. Dia 29 di April Super Depor lo bin todo por todo pa sigura e titulo tan anhela.